Իմ օրվա ամփոփումը
Այսօրվա օրը բավականին արդյունավետ ու հետաքրքիր անցավ, քանի որ շատ տարբեր ու օգտակար աշխատարանների մասնակցեցինք։ Ամեն ինչ սկսվեց առավոտյան՝ մասնակիցների հերթական գրանցումով ու հաշվառումով։ Երբ բոլորս հավաքվեցինք, մեզ հետ հանդիպման եկավ Հետազոտական վարժարանի ղեկավարը։ Նա մեզ շատ մանրամասն պատմեց, թե ինչով է զբաղվում վարժարանը, ինչ նպատակներ ունի և ինչ հետաքրքիր ու մեծ ծրագրեր են սպասվում առաջիկայում։ Մենք ուշադիր լսում էինք ու արդեն պատկերացնում մեր անելիքները։
Հանդիպումից հետո անմիջապես սկսվեց հայերենի աշխատարանը։ Այստեղ մեզ համար մի շատ ինքնատիպ ու ստեղծագործական առաջադրանք էին պատրաստել։ Մենք պետք է փորձեինք նկարագրել ու բնութագրել ինքներս մեզ երեք տարբեր առարկաների միջոցով, որոնք ինչ-որ ձևով կապված են մեր բնավորության հետ։ Դրանից հետո յուրաքանչյուրս ընտրեց այդ երեք առարկաներից մեկը, որն ամենից շատ էր մեզ դուր գալիս, ու սկսեց աշխատել հենց դրա շուրջ։ Մենք գտնում էինք այդ առարկայի հոմանիշները, մտածում հետաքրքիր բառեր ու ամբողջական նկարագրություն գրում դրա մասին։
Հաջորդ ժամին անցանք բլոգավարության աշխատարանին, որն ինձ համար շատ կարևոր էր։ Ես որոշեցի ժամանակս ճիշտ օգտագործել ու ամբողջությամբ զբաղվել իմ անձնական բլոգը կարգի բերելով։ Որպեսզի այն ավելի կոկիկ տեսք ունենա, ես ստեղծեցի լիովին նոր ու թարմ մենյու։ Իսկ որպեսզի էջը շատ չծանրաբեռնվի, բոլոր նախորդ ու հին բաժինները տեղափոխեցի արխիվ։ Մի քանի փոքրիկ դիզայներական ձևափոխություններ էլ արեցի ու, ի վերջո, բլոգս դարձավ շատ ավելի կազմակերպված, գեղեցիկ ու հարմար՝ օգտագործելու համար։
Այնուհետև սկսվեց անգլերենի աշխատարանը, որը նույնպես շատ ակտիվ ու աշխույժ անցավ։ Սկզբում դասախոսը մեզ մի քանի պարզ ու թեթև հարցեր տվեց, որպեսզի ստուգի մեր գիտելիքները և հասկանա, թե ով ինչ մակարդակի է տիրապետում լեզվին։ Դրանից հետո մեզ բաժանեցին խմբերի, ու մենք սկսեցինք կատարել խմբային աշխատանք՝ որևէ մեծ գիտական հայտնագործության թեմայով։ Մեր խումբը միասին քննարկեց ու որոշեց ընտրել Իսահակ Նյուտոնի կողմից գրավիտացիայի, այսինքն՝ երկրագնդի ձգողականության օրենքի բացահայտման պատմությունը։ Մենք միասին տեղեկություններ հավաքեցինք ու պատրաստեցինք մեր ներկայացումը (պրեզենտացիան)։
Այս ամենից հետո եկավ երկար սպասված ընդմիջման ժամը։ Մենք լավ հանգստացանք, զրուցեցինք ու նոր ուժերով վերադարձանք դասարան՝ մասնակցելու հետազոտական աշխատանքի աշխատարանին։ Այստեղ մեզ շատ մատչելի ձևով բացատրեցին, թե ինչպես է պետք ճիշտ հետազոտություն կատարել, որոնք են դրա հիմնական ու կարևոր փուլերը, ինչից պետք է սկսել և ինչպես ձևակերպել վերջնական նյութը։
Դե իսկ օրվա ամենավերջում, ինչպես միշտ, հավաքեցինք ու ամփոփեցինք մեր կատարած բոլոր աշխատանքները, տեղադրեցինք մեր բլոգներում և տպավորված ու հոգնած ավարտեցինք այս հետաքրքիր օրը։
Մհեր Մկրտչյան 